සිරිලිය රථය සම්බන්ධයෙන් රසපරීක්ෂක වාර්තාවක් කැදවයි

වාහනයේ ‍මානව ජෛව කොටස් ඇඳුම් කොටස් හෝ වෙඩි ද්‍රව්‍ය තිබේද?

රගර් ක්‍රීඩක මොහොමඩ් වසීම් තාජුඩීන් පැහැරගෙන ගොස් ඝාතනය කිරීමේ සිද්ධියට යොදා ගෙන ඇති බව කියන ජාත්‍යන්තර රතු කුරුස සංවිධානය විසින් හිටපු ජනපති බිරිය ශිරන්ති රාජපක්ෂ මහත්මිය වෙත සිරිලිය සවිය ව්‍යාපෘති කටයුතු සඳහා පරිත්‍යාග කරන ලද ඩිෆේන්ඩර් රථයේ මානව ජෛව කොටස් හෝ වෙඩි ද්‍රව්‍ය තිබේ දැයි යන්න පරීක්ෂා කොට අධිකරණයට වාර්තාවක් ගොනු කරන ලෙසට කොළඹ අතිරේක මහේස්ත්‍රාත් ඉසුරු නෙත්තිකුමාර මහතා ‍ඊයේ (19) රජයේ රස පරීක්ෂකවරයා වෙත නියෝග කළේය.

තාජුඩීන් නඩුවේ නඩු භාණ්ඩයක් ලෙස නම් කර ඇති ඩබ්ලිව්. පී. කේ. ඒ. 0642 දරන ඩිෆේන්ඩර් රථය දැනට රහස් පොලිසිය භාරයේ තිබෙන බවත් මේ වාහනය තාජුඩීන් ඝාතනයට පෙර පැහැර ගැනීමට ලක් කළ වාහනය බවට සාක්කි ලැබී ඇති බැවින් මේ වාහනයේ ‍මානව ජෛව කොටස් ඇඳුම් කොටස් හෝ වෙඩි ද්‍රව්‍ය තිබේද? යන්න පරීක්ෂා කොට එසේ ඇත්නම් එය විශ්ලේෂණය සඳහා සුරක්ෂිතව තබන ලෙසට දන්වමින් මහේස්ත්‍රාත්වරයා රස පරීක්ෂකවරයා වෙත නියෝග නිකුත් කළේය.

රහස් පොලිසිය විසින් මෝසමක් ගොනු කරමින් අධිකරණයෙන් කරන ලද ඉල්ලීම සලකා මහේස්ත්‍රාත්වරයා මේ නියෝගය නිකුත් කෙරිණ.

හිටපු ඇමැති ෆීලික්ස් පෙරේරා මහතා විසින් 2011/8/11 සිරිලිය ව්‍යාපෘතිය සඳහා මුදා හැර තිබුණ ද එම ව්‍යාපෘතිය සඳහා කිසිම අවස්ථාවක රථය ලබා නොදුන් බවටත් මේ රථය යෝෂිත රාජපක්ෂ මහතා විසින් සිය පුද්ගලික පරිහරණය සඳහා යොදා ගෙන ඇති බවට කරුණු වාර්තා වන බවට රහස් පොලිසිය අධිකරණයට කරුණු දක්වා තිබිණ.

යෝෂිත රාජපක්ෂ මහතාගේ උපදෙස් අනුව 2012 වර්ෂයේ දෙසැම්බර් මස මැද භාගයේ දී සී. එස්. එන්. මාධ්‍ය ජාලයේ අලෙවි විධායක ඩීන් නැමැත්තා විසින් කොල්ලුපිටිය ප්‍රදේශයේ ගරාජයකින් මේ රථය කළු පැහැ ගැන්වීම සිදු කර ඇති බවට රහස් පොලිසිය අධිකරණය වෙත කරුණු වාර්තා ‍කර තිබිණ.‍

2015 ජනාධිපතිවරණයෙන් පසු ජනවාරි 20 හෝ 21 යන දිනක දී ජනාධිපති ලේකම් කාර්යාලයේ කුලසේකර නැමැත්තාගේ නිවෙසේ දමා ගොස් තිබූ බවට රහස් පොලිසිය අධිකරණය වෙත කරුණු දන්වා තිබිණ. සැකකටයුතු ඩිෆෙන්ඩර් රථ දෙකක් හෝමාගම හබරකඩ ඇති බවට 2016/3/3 රහස් පොලිසියට ලද තොරතුරක් අනුව මෙහි විමර්ශන ආරම්භ කර තිබේ.

ඩබ්ලිව්. පී. කේ. ඊ. 3671 හා ඩබ්ලිව්. පී. කේ. ඒ. 0642 දරන ඩිෆෙන්ඩර් රථ දෙක සම්බන්ධයෙන් 2015/2/18 විමර්ශන ආරම්භ කර ඇත.

රතු කුරුස සංවිධානයේ අධ්‍යක්ෂ ජනරාල්ගේ නමට රථ ලියාපදිංචි වී ඇති බවත් 2015/2/20 සිරිල් සෙවණ හබරකඩ හෝමාගම ලිපිනයේ කළු පැහැති ඩිෆෙන්ඩර් රථය රහස් පොලිසිය විසින් සොයා ගෙන ඇති බවත් මේ රථය 2011 මැද භාගයේ දී යෝෂිත රාජපක්ෂ මහතාගේ දැනුම් දීමෙන් සුදු පාට ඉවත් කර නිල් වර්ණය යෙදු බවත් එය විජයකුමාරතුංග මාවත, පොල්හේන්ගොඩ, කොළඹ 5, රිලයබල් මෝටර්ස් නමැති ස්ථානයෙන් සිදු කර ඇති අතර, නැවත 2012 දෙසැම්බර් මැද භාගයේ දී ඩීන් නැමැත්තාට දුන් උපදෙස් මත කොල්ලුපිටිය ප්‍රදේශයේ ගරාජයකින් කළු වර්ණය ගැන් වූ බවට අධිකරණ වාර්තාවේ සඳහන්ය.

ජනපති කාර්යාලය මඟින් ඉන්ධන ඇතුළු නඩත්තු සඳහා ගෙවීම් සිදු කර ඇති බවට රහස් පොලිසිය අධිකරණයට කරුණු වාර්තා කර තිබිණ.

නාරාහේන්පිට ශාලිකා ක්‍රීඩාංගණය අසල හැව්ලොක් පෙදෙසේ දී 2012/5/17 අලුයම් කාලයේ දී වාහනයක් තුළ දී පිලිස්සී මිය ගිය රගර් ක්‍රීඩක මොහොමඩ් වසීම් තාජුඩීන්ගේ මරණය මනුෂ්‍ය ඝාතනයක් බවට නිගමනය වූ බව පවසන රහස් පොලිසිය තාජුඩීන් පැහැර ගැනීමට මේ ඩිෆෙන්ඩර් රථය යොදා ගත් බවට සාධාරණ සැකයක් මතු වී ඇති බැවින් එම නඩුවේ නඩු භාණ්ඩයක් ලෙස මේ ඩිෆෙන්ඩර් රථය නම් කරන ලෙසට රහස් පොලිසිය අධිකරණයෙන් ඉල්ලා සිටියේය. අදාළ කරුණු සලකා බැලු මහේස්ත්‍රාත්වරයා ප්‍රධාන මහේස්ත්‍රාත් අධිකරණයේ පාට වෙනස් කිරීම සම්බන්ධ නඩුවේ නඩු භාණ්ඩයක්ව තිබෙන ඩිෆෙන්ඩර් රථය තාජුඩීන්‍ නඩුවේ නඩු භාණ්ඩයක් ලෙස නම් කෙරිණ.

මේ ඩිෆෙන්ඩර් රථය දැනට රුපියල් ලක්ෂ 50ක බැදුම්කරයක් මත 2016/5/4 වන දින අධිකරණය විසින් රතුකුරුස සංවිධානයේ නියෝජිතයකු වෙත මුදා හැර තිබූ අතර, දැනට රහස් පොලිසිය භාරයේ වාහනය ඇත.

Leave a Reply

Your email address will not be published. Required fields are marked *