කොරෝනා වෛරසය: “කිසිදා ලොවින් තුරන් නොවෙි-දෙවැනි රැල්ලක්–WHO

කොරෝනා වෛරසය: “කිසිදා ලොවින් තුරන් නොවන වෛරසයක් විය හැකියි

"අපේ නිර්දේශය නම් ඕනෑම රටකට පවතින අවදානම තවමත් ඉහළම මට්ටමින් පවතින බව සැලකිය යුතු බවයි"
Image caption”අපේ නිර්දේශය නම් ඕනෑම රටකට පවතින අවදානම තවමත් ඉහළම මට්ටමින් පවතින බව සැලකිය යුතු බවයි”

නව කොරෝනාවෛරසය “කිසිදා තුරන් නොවිය හැකි” බවට ලෝක සෞඛ්‍ය සංවිධානය (WHO) අනතුරු අඟවයි.

මෙම වෛරසය ලෝකයෙන් තුරන් වන්නේ කවදාදැයි අනාවැකි පළ කිරීමට දරන උත්සාහයට එරෙහිව මෙම අනතුරු ඇඟවීම කරනු ලැබුවේ ලෝක සෞඛ්‍ය සංවිධානයේ, හදිසි අවස්ථා පිළිබඳ අධ්‍යක්‍ෂ, වෛද්‍ය මයික් රයන් විසිනි.

බදාදා (මැයි 13) පැවති කරුණු පැහැදිලි කිරීමක දී ඔහු තවදුරටත් කියා සිටියේ එන්නතක් සොයා ගැනීමට හැකියාවක් ලැබුනත් වෛරසය පාලනය කිරීම සඳහා “අති විශාල පරිශ්‍රමයක්” දැරීමට සිදුවනු ඇති බවය.

මේ වන විට නව කොරෝනාවෛරසය ආසාදනය වීම නිසා ලොව පුරා 300,000කට ආසන්න පිරිසක් මිය ගොස් ඇති අතර මිලියන 4.3කට අධික පිරිසකට ආසාදනය වූ බවට තහවුරු වී තිබේ.

ලෝක සෞඛ්‍ය සංවිධානය පවසන්නේ මොනවාද?

“මේ ගැන කතා කිරීම ඉතා වැදගත්. මේ වෛරසය අප අතර දිගටම පවතින තවත් වෛරසයක් බවට පත් විය හැකියි. එය කිසිදා ලොවින් තුරන් නොවන වෛරසයක් වෙන්නත් පුළුවන්.” ජිනීවා නුවර පැවති මාධ්‍ය සම්මන්ත්‍රණයක් අමතමින් වෛද්‍ය මයික් රයන් පැවසීය.

“HIV තුරන් වෙලා ගිහින් නැහැ. නමුත් ඒ වෛරසයට මුහුණ දීම සඳහා අපි හැඩ ගැහුණා.”

“මෙම වෛරසය අතුරුදහන් වන්නේ කවදාද යන්න පිළිබඳව” කිසිවෙකුට අනාවැකි පළ කළ හැකිවෙතැයි තමා විශ්වාස නොකරන බව ද හෙතෙම පැවසීය.

මෙම වෛරසය ලෝකයෙන් තුරන් වන්නේ කවදා ද?
Image captionමෙම වෛරසය ලෝකයෙන් තුරන් වන්නේ කවදා ද?

එන්නත් සොයා ගෙන තිබියදීත්…

මේ වන විට නව කොරෝනාවෛරසයට එරෙහිව එන්නත් 100කට අධික ප්‍රමාණයක් සංවර්ධනය වෙමින් පවතී.

නමුත් එන්නත් සොයා ගෙන තිබියදීත් සදහටම තුරන් කිරීමට නොහැකි වූ සරම්ප වැනි රෝග තවමත් ඇති බව වෛද්‍ය රයන් සිහිපත් කළේය.

මේ අතර ලෝක සෞඛ්‍ය සංවිධානයේ අධ්‍යක්‍ෂ ජනරාල්, විශේෂඥ වෛද්‍ය Tedros Adhanom Ghebreyesus අවධාරණය කර සිටියේ පරිශ්‍රමයක් දැරීම තුළින් මෙම වෛරසය පාලනය කර ගත හැකි බවය.

“ඉදිරි ගමන් මග තියෙන්නේ අපේ අතේ. එය හැම දෙනාගේම කාර්යභාරයක්. මේ වසංගතය නතර කිරීම සඳහා හැම දෙනාගේම සහයෝගය තිබිය යුතුයි,” ඔහු පැවසීය.

වසංගතයෙන් මිදීමට කාලයක්

මෙම මාධ්‍ය සම්මන්ත්‍රණය අමතමින් ලෝක සෞඛ්‍ය සංවිධානයේ වසංගත රෝග පිළිබඳ විශේෂඥ මාරියා වැන් කර්කොෆ් ප්‍රකාශ කළේ මෙම වසංගතයෙන් මිදීමට කාලයක් ගතවනු ඇති බවට තේරුම් ගනිමින් ඒ සඳහා අපගේ මනස සකසා ගත යුතු බවය.

ඔවුන් මෙම කරුණු ඉදිරිපත් කළේ ඇතැම් රටවල් සිය ලොක්ඩවුන් නීති ලිහිල් කරමින් සහ තම ආර්ථිකය නැවත විවෘත කළ යුත්තේ කවදාද හා කෙසේද යන්න පිළිබඳව රාජ්‍ය නායකයන් සැලකිලිමත් වෙමින් සිටින අතරතුරය.

එන්නත් සොයා ගෙන තිබියදීත් සදහටම තුරන් කිරීමට නොහැකි වූ සරම්ප වැනි රෝග තවමත් ඇත
Image captionඑන්නත් සොයා ගෙන තිබියදීත් සදහටම තුරන් කිරීමට නොහැකි වූ සරම්ප වැනි රෝග තවමත් ඇත

දෙවැනි වසංගත රැල්ලක්

කෙසේ නමුත් ලොක්ඩවුන් නීති ලිහිල් කිරීමේදී දෙවැනි වසංගත රැල්ලක් ඇති නොවන බවට සහතිකයක් දිය හැකි ක්‍රමවේදයක් නොමැති බවට ලෝක සෞඛ්‍ය සංවිධානයේ අධ්‍යක්‍ෂ ජනරාල්වරයා අනතුරු ඇඟවීය.

“විවිධ ක්‍රියාමාර්ග ඔස්සේ මේ තත්වයෙන් මිදීමට බොහෝ රටවල් කැමති වේවි. නමුත් අපේ නිර්දේශය නම් ඕනෑම රටකට පවතින අවදානම තවමත් ඉහළම මට්ටමින් පවතින බව සැලකිය යුතු බවයි” ඔහු ප්‍රකාශ කළේය.

මේ අතරතුර වෛද්‍ය මයික් රයන් ප්‍රකාශ කළේ “ලොක්ඩවුන් කිරීම හැම අතින්ම සාර්ථකයි කියන සහ ඒ නීති ඉවත් කිරීමෙන් සියල්ල ඉතා හොඳින් සිදුවේවි කියන අපූරු සිතුවිලි අසන්නට ලැබෙනවා. ඒ ක්‍රම දෙක තුළ ම අනතුර ගැබ්වෙලා තියෙනවා,” යනුවෙනි.

උපුටා ගැනිම–බිබිසි

Leave a Reply

Your email address will not be published. Required fields are marked *